【am專訪】本報早於去年5月曾訪問梁振英，當時他首次對參選特首明確表態，表示抱持「當仁不讓」的態度。本報近期先後約訪3名特首候選人，今日先刊出唐英年專訪，並已邀約何俊仁訪問，至於梁振英則以未能安排時間為理由而推卻訪問。
記者：鄭秀韻 攝影：黃文山
六四事件一直是香港人糾結難解的情意結，特首候選人唐英年昨日接受本報專訪時表示，明白香港人對六四的感受，他若當選特首，會確保今後六四遊行及燭光晚會仍會繼續在港舉行，讓市民自由抒發情感。他又說，若當選會團結各階層，並與泛民主派合作，絕不會以強硬手段對待反對聲音，亦不會箝制傳媒的採訪及報道自由。
另一候選人梁振英過去一直避談六四，唐英年昨日接受本報訪問時，雖然回答六四問題的取態與過去一樣，但相對顯得較人性。談到09年六四事件20周年，參與燭光晚會的人數達15萬，創18年新高，唐英年說，「我諗絕大多數我哋呢啲age group嘅人，都會記得六四當晚發生嘅事，個印象一定好清楚記得，所以香港人係有好深感受，呢個好深嘅感受，必須要有機會俾佢哋抒發出嚟，令佢哋同人去share，所以六四燭光晚會、遊行都能保持到，可以喺香港進行，呢個係一國兩制嘅完整性，就係核心價值可以得以保障，而唔係話呢個政治議題好敏感，香港要打壓你，咁樣就會失去一國兩制嘅完整性。」
唐英年明言，若當選特首，六四遊行及燭光晚會每年仍會繼續舉行，「我會確保香港言論表達自由嘅核心價值，一定得到保障，呢個係我一個solid promise(堅定承諾)嚟嘅。」
不會箝制傳媒採訪報道自由
唐英年自參選以來，被傳媒揭發九龍塘約道大宅僭建，亦因感情缺失及私生子等傳聞不停被傳媒爆料，令其民望跌至谷底，但他坦言從來「無嬲過」傳媒，他強調，「我唔會因為對我同我家人有咁大壓力，而去箝制傳媒嘅採訪同報道自由，因為呢個係言論同表達自由嘅一部分。」他並笑對傳媒的負面報道，「可能今次成個選舉最震撼嗰個場面，就係嗰架吊雞車喺我約道屋企，我諗啲人N年後都會記得呢一個場面！」
唐英年投身政圈20年，其中9年在官場度過，從來無向傳媒機構發過律師信，但他自爆，「有好幾次好seriously tempted(曾認真想做)，(有傳媒)求其出啲random picture(無求證的圖片)就話呢個係紅酒女郎喇，或者搵我舊時個助理嚟開刀啦………」但他最終並無發律師信，他反問：「出封(律師)信個作用有幾大呢？」
有數份報章上周曾刊出被指是唐英年私生女的相片，唐坦言「睇到有時有啲傳媒相當不負責任，登一個少女相出嚟………」記者問他為何不予否認，「因為我唔想牽涉第三者………所以個(少女)爹哋咪好㷫出嚟否認囉，結果傳媒都要自己出apologise、要道歉囉。」
梁振英過去曾擬向傳媒機構發出律師信，唐英年說，「佢成日都出信㗎啦，好似喺大學(梁振英曾任城大校董會主席)裡面，啲師生唔知講啲咩，佢都會出律師信㗎喎………」
唐英年強調，「我唔會輕易出律師信俾人，或出一封律師信去嚇人」，只會抱著「算啦」的態度，「我個人其實好大量，好多唔開心嘅事，我好快會唔記得咗。」
政改最後階段親與泛民談判
相對於對手，唐英年一直強調自己優勝之處是可團結各階層，當中包括泛民主派，而過程中要凝聚社會，需有包容胸襟及互信基礎。他指過去在政府工作期間，曾與泛民合作，他舉例指2010年通過的政改方案，便與泛民有一定溝通，「當時我做CS(政務司長)，一人兩票(方案)最後嗰個deal(協議)，係我同(政制及內地事務局長)林瑞麟兩個親自去講，(喺政府總部)同(民主黨主席)何俊仁坐低傾………」
他又說，過去處理西九文化局、關愛基金及扶貧委員會，也曾與泛民主派人士合作。提及何俊仁，唐英年指與他交手較多，「我好尊重何俊仁，因為佢係一個有原則嘅人，我自己亦係有原則嘅人，所以大家為原則堅持，我係好尊重佢，就算嗰日最終做唔到個deal，大家都仍然可以做朋友，政治上可以和而不同，求同存異最好啦………」他並表明，日後若當選，也不會用強硬手段對待反對聲音，「因為香港社會最大嘅優勢，就係我哋能夠有多元社會，而多元社會必然係要互相尊重，有好多係和而不同嘅現象出現，政治就係咁樣，政治就係the art of compromise(妥協的藝術)，大家可唔可以透過妥協嚟達到共同目標，而呢個共同目標，就係民主政制向前行囉。」
(專訪內容另見P.04)
This entry passed through the Full-Text RSS service — if this is your content and you're reading it on someone else's site, please read the FAQ at fivefilters.org/content-only/faq.php#publishers. Five Filters recommends: Donate to Wikileaks.
沒有留言:
張貼留言